मित्रांना भेटून घरी परतणाऱ्या तरूणाचे अपहरण करून मारहाण
November 4, 2023
64 Less than a minute
मुंबई | मित्राला भेटून घरी परत जाणाऱ्या तरूणाला अज्ञातांनी रोखून त्याच्यावर हल्ला करत मारहाण केल्याची खळबळजनक घटना उघडकीस आली आहे.एवढेच नव्हे तर त्याला मारहाण करून त्याच्याकडून १० हजार रुपये लुटून ते फरार झाले. चेंबूरमध्ये हा प्रकार घडला असून याप्रकरणी आरसीएफ पोलिसांनी गुन्हा दाखल करत एकाला अटक केली आहे. तर त्याच्या इतर साथीदारांचा पोलीस शोध घेत आहेत.पोलिसांनी दिलेल्या माहितीनुसार, पीडित तरूण सरफराज शेख (वय २२) हा चेंबूरच्या वाशीनाका परिसरात राहतो. बुधवारी रात्री मित्राला भेटल्यानंतर दुचाकीवरून तो घरी परत जात होता. याच वेळी वाशीनाका परिसरातील नागाबाबा नगर येथे अचानक चार तरूण त्याच्या दुचाकीसमोर आले. त्यांनी त्याचे अपहरण केले आणि त्याला गोवंडी परिसरात नेऊन बेदम मारहाण केली.एवढेच नव्हे तर त्या तरूणांनी सरफराज याच्याकडील १० हजार रुपयांची रोख रक्कम खेचून घेतली आणि पैसे घेऊन ते लगेचच तिथून फरार झाले. मारहाणीत जखमी झालेल्या सरफराजने कसेबसे आरसीएफ पोलिस स्टेशन गाठले आणि पोलिसांसमोर सर्व प्रकार कथन करत आरोपींविरोधात तक्रार दाखल केली. त्याआधारे आरसीएफ पोलिस स्टेशनच्या अधिकाऱ्यांनी अज्ञात आरोपींविरोधात गुन्हा दाखल करत तातडीने तपास सुरू केला. मारहाण करणाऱ्यांपैकी एका तरूणाला अटक करण्यात पोलिसांना यश मिळाले. मात्र त्याच्या इतर साथीदारांचा अद्याप शोध सुरू आहे. ही मारहाण नेमकी का केली, इतर साथीदार कुठे आहेत याप्रकरणी पोलिस अधिक तपास करत आहेत.
Loading ...
